عرب لیگ کی لبنان پر اسرائیلی حملوں کی شدید مذمت

عرب لیگ نے لبنان پر اسرائیل کے تازہ فضائی حملوں کی شدید مذمت کرتے ہوئے خبردار کیا ہے کہ اسرائیلی کارروائیاں خطے میں جاری تنازع کو مزید پھیلانے کا سبب بن سکتی ہیں۔عرب لیگ کے مطابق ہفتے کو ہونے والے اسرائیلی حملے، جن میں 11 افراد جاں بحق ہوئے، خطرناک کشیدگی کی علامت ہیں اور ان سے تنازع کے حل کے لیے جاری کوششوں کو نقصان پہنچ سکتا ہے۔الجزیرہ کے مطابق عرب لیگ کے ترجمان نے اسرائیل کے مسلسل حملوں پر تشویش کا اظہار کرتے ہوئے کہا کہ لبنان پر ہونے والی تازہ کارروائیاں خطرناک ہیں، جو جاری تنازع کے حل کے لیے کی جانے والی کوششوں کو پٹڑی سے اتار سکتی ہیں۔ترجمان نے اسرائیل کی پالیسیوں اور اقدامات پر تنقید کرتے ہوئے کہا کہ ان سے بظاہر یہ ظاہر ہوتا ہے کہ اسرائیل کشیدگی اور محاذ آرائی کو طول دینا چاہتا ہے، مذاکرات کی راہ میں رکاوٹیں پیدا کررہا ہے اور میدان میں ایک ایسی نئی صورتحال مسلط کرنے کی کوشش کررہا ہے جسے عرب لیگ ناقابل قبول اور مسترد کرتی ہے۔عرب لیگ کا یہ بیان جنوبی لبنان میں اسرائیلی حملوں کے بعد سامنے آیا ہے۔ ان حملوں میں 11 افراد جاں بحق ہوئے تھے، جن میں تین بچے بھی شامل تھے۔ حملوں کے نتیجے میں متعدد افراد زخمی بھی ہوئے اور جنوبی لبنان کے مختلف علاقوں میں عمارتوں کو نقصان پہنچا۔عرب لیگ نے خبردار کیا کہ اگر عالمی برادری نے فوری طور پر صورتحال پر قابو پانے کے لیے مؤثر اقدامات نہ کیے تو لبنان میں جاری کشیدگی مزید وسیع ہوسکتی ہے۔ تنظیم نے خاص طور پر امریکا سے مطالبہ کیا کہ وہ اسرائیل پر دباؤ ڈالے تاکہ حملے روکے جائیں اور خطے میں کشیدگی کم کی جاسکے۔