موغادیشو کے ساحل پر مسلح گروپ کا حملہ، 32افراد ہلاک، 63زخمی

موغا دیشو:صومالیہ کے دارالحکومت موغادیشو کے ایک مصروف ساحل پر دہشتگرد تنظیم القاعدہ سے منسلک مسلح گروپ الشباب کے حملے میں 32 افراد ہلاک اور 63 زخمی ہوگئے۔صومالیہ کے حکام نے تصدیق کی ہے کہ موغادیشو کے ساحل پر کیے جانے والا حملہ الشباب گروپ کی جانب سے کیا گیا جس میں 32 افراد ہلاک اور 63 زخمی ہوئے، جمعہ کو رات گئے الشباب کے مسلح افراد نے ساحل سمندر پر موجود لوگوں پر فائرنگ شروع کردی اور بعد ازاں ایک خود کش حملہ آور نے خود کو دھماکے سے اُڑا دیا۔القاعدہ سے منسلک دہشتگرد گروپ گزشتہ 17 سالوں سے عالمی سطح پر حمایت یافتہ حکومت کے خلاف بغاوت کر رہے ہیں، جس نے ایک ریڈیو سٹیشن کے ذریعے اعلان میں لائیڈو بیچ پر حملے کی ذمہ داری قبول کی۔پولیس اور عینی شاہدین کا کہنا ہے کہ ایک خود کش بمبار نے بیچ ویو ہوٹل کے مرکزی گیٹ کے قریب خود کو دھماکے سے اڑایا جس کے بعد کچھ مسلح افراد نے ساحل پر موجود لوگوں پر فائرنگ شروع کردی، حملے کے فوراً بعد سوشل میڈیا پر شیئر کی جانے والی غیر تصدیق شدہ ویڈیوز میں دیکھا جاسکتا ہے کہ ساحل سمندر پر خون میں لت پت لاشیں بکھری ہوئی پڑی ہیں۔پولیس کے ترجمان عبد الفتاح عدن حسن نے ایک پریس کانفرنس کے دوران صحافیوں کو بتایا کہ حملے میں 32 شہری ہلاک اور تقریباً 63 زخمی ہوئے، جن میں زیادہ تر زخمیوں کی حالت تشویشناک ہے۔پولیس افسر محمد عمر کا میڈیا سے گفتگو کرتے ہوئے کہنا تھا کہ حملہ آوروں نے جیسے ہی لوگوں پر فائرنگ شروع کی تو سکیورٹی فورسز کی جوابی کارروائی میں پانچ دہشت گرد مارے گئے اور چھٹے دہشت گرد نے خود کو دھماکے سے اڑا دیا، اس دوران ایک پولیس اہلکار ہلاک اور ایک زخمی ہوا۔دوسری جانب عینی شاہد عبدالطیف علی نے بتایا کہ میں قریبی ہوٹل میں موجود تھا، جہاں سے یہ سارا منظر دیکھا، حملہ اتنا اچانک تھا کہ کسی کو بھی سمجھ نہیں آئی، ہر کوئی خوفزدہ تھا اور اپنی جان بچانے کے لیے یہاں وہاں بھاگ رہا تھا۔