پاپ گلوکارہ شکیرا کی طبیعت ناساز، ہسپتال منتقل کر دیا گیا

لیما:کولمبئین پاپ گلوکارہ شکیرا کو اچانک طبعیت بگڑنے پر اسپتال منتقل کر دیا گیا ہے۔
غیر ملکی میڈیا رپورٹ کے مطابق گلوکارہ کو معدے کی تکلیف کے باعث پیرو کے اسپتال میں داخل کیا گیا ہے جبکہ، پیرو میں شیڈول گلوکارہ نے اپنے تمام کنسرٹس بھی منسوخ کردیے۔
رپورٹ میں بتایا گیا ہے کہ گلوکارہ کا علاج جاری ہے جبکہ ڈاکٹرز نے انہیں آرام کرنے کا مشورہ دیتے ہوئے پرفارم کرنے سے روک دیا ہے۔
سماجی رابطے کی ویب سائٹ ایکس سابقہ ٹوئٹر پر شکیرا نے مداحوں کیلئے پیغام جاری کرتے ہوئے بتایا ہے کہ وہ اسپتال میں داخل ہیں، ڈاکٹرز نے انہیں پرفارم کرنے سے روک دیا ہے تاہم وہ جلد صحتیاب ہو کر مداحوں سے ملیں گی۔
گلوکارہ کا کہنا تھا کہ انہیں آج پرفارم نہ کرنے پر افسوس ہے لیکن وہ پیرو کے عوام سے ملنے کے لیے پرجوش ہیں اور جلد ہی ان کیلئے پرفارم بھی کریں گی۔
یاد رہے کہ گلوکارہ شکیرا جمعہ کے روز پیرو پہنچی تھیں جہاں ان کے متعدد کنسرٹس شیڈول تھے۔