فورٹ بینڈ میں ووٹر آگاہی کی بھرپور نشست، تعلیم پر مکالمے کے ساتھ ووٹرز کو متحرک کرنے کی اپیل
فورٹ بینڈ، ٹیکساس(رپورٹ: عبدالرحمن پٹیل)امریکن مسلمز کی ’’گیٹ آؤٹ دی ووٹ‘‘ مہم کے تحت 18 اکتوبر 2026 کو شوگر لینڈ کے ایلنگز چائنیز بسٹرو میں ایک بھرپور نشست منعقد ہوئی۔ سہ پہر تین سے پانچ بجے تک جاری رہنے والے پروگرام میں ٹیکساس اسٹیٹ بورڈ آف ایجوکیشن کے ڈسٹرکٹ 7 کی امیدوار ٹفنی پرکنز اور ڈسٹرکٹ 8 کی امیدوار ڈاکٹر ڈینا وین ڈی واکر نے شرکت کی۔ کھچا کھچ بھری نشست میں بچوں کی تعلیم، نصابی فیصلوں اور انتخابی شرکت پر گفتگو ہوئی جبکہ دونوں امیدواروں کو ووٹ دینے کی اپیل بھی کی گئی۔یہ پروگرام جاری ’’مسائل جانیے، ٹیکساس 2026 اسپیکر سیریز‘‘ کا حصہ تھا۔ افشی چرانیا، مریم خان، نبیلہ منصور اور سید قیصر ’’کیو‘‘ امام کے اس مشترکہ اقدام کا بنیادی مقصد کمیونٹی کو اہم عوامی مسائل سے آگاہ کرنے کے ساتھ ووٹرز کو عملی طور پر ووٹ ڈالنے کیلئے متحرک کرنا ہے۔نشست میں اس سوال کو مرکزی اہمیت حاصل رہی کہ ٹیکساس کے بچوں کو کلاس روم میں کیا پڑھایا جائے، اس کا فیصلہ کون کرتا ہے؟ گفتگو میں اسٹیٹ بورڈ آف ایجوکیشن کے کردار، نصابی معیارات، درسی کتب اور سرکاری اسکولوں کے طلبہ پر تعلیمی فیصلوں کے اثرات کو موضوع بنایا گیا۔ سوال و جواب کے بھرپور سیشن میں حاضرین نے دونوں امیدواروں سے براہ راست سوالات کیے اور ان کی تعلیمی ترجیحات جاننے کا موقع حاصل کیا۔پروگرام کے بنیادی پیغام ’’ووٹ ڈالنے کے لیے باہر نکلیے‘‘ کو عملی اقدام سے جوڑتے ہوئے ووٹرز سے درخواست کی گئی کہ وہ خود ووٹ ڈالیں اور اپنے اہلِ خانہ میں شامل اہل ووٹرز کو بھی ساتھ لے جائیں۔ ہر شریک سے اپیل کی گئی کہ وہ کم از کم دس ووٹرز کی فہرست بنائے، انہیں فون کرکے ووٹ ڈالنے کی یاد دہانی کرائے اور انہیں پولنگ بوتھ تک پہنچانے کی ذمہ داری لے، خصوصاً ان افراد کی مدد کرے جنہیں آمدورفت میں دشواری ہو۔اس موقع پر ووٹرز کے نام ہاتھ سے ذاتی پیغامات پر مشتمل پوسٹ کارڈ بھی لکھے گئے۔ مہم کے آغاز سے جاری اس سرگرمی کے تحت منتظمین اور رضاکار اب تک کئی سو پوسٹ کارڈ تحریر کر چکے ہیں ان پیغامات کے ذریعے ووٹرز کو انفرادی انداز میں رابطے اور یاد دہانی کے ساتھ انتخابی عمل میں شرکت کی ترغیب دی جا رہی ہے۔تعلیمی مسائل پر مکالمے، امیدواروں سے براہ راست سوالات اور ووٹرز تک ذاتی رابطے کی ان کوششوں نے نشست کو ایک بامقصد عملی سرگرمی بنا دیا۔ پروگرام کا پیغام واضح تھا کہ انتخابی شرکت کی ذمہ داری اپنے ووٹ سے شروع ہوتی ہے اور دوسروں کو ووٹ ڈالنے میں مدد دینے سے مزید مؤثر بنتی ہے۔
