چین کا امریکا پر جوابی وار، ٹرمپ کے نئے ٹیرف کو منافقانہ قرار دیدیا

بیجنگ: چین نے امریکی صدر ڈونلڈ ٹرمپ کی جانب سے چینی مصنوعات پر عائد تازہ 100 فیصد ٹیرف کو منافقانہ قرار دیتے ہوئے سخت ردعمل دیا ہے، تاہم چین نے اس بار امریکی مصنوعات پر نئے محصولات عائد نہ کرنے کا فیصلہ کیا ہے۔
چینی وزارتِ تجارت کے مطابق امریکا کے اقدامات دوطرفہ تعلقات کے لیے نقصان دہ ہیں۔ وزارت نے کہا کہ نایاب ارضی معدنیات پر برآمدی کنٹرول، عسکری استعمال کے خدشات کی وجہ سے لگائے گئے ہیں، یہ کوئی مکمل پابندیاں نہیں۔
چین نے کہا کہ وہ تجارتی جنگ نہیں چاہتا، مگر اگر امریکا نے اپنا رویہ درست نہ کیا تو چین مناسب جوابی اقدامات کرے گا۔
واضح رہے کہ امریکی صدر ٹرمپ نے جمعے کے روز چین پر اضافی محصولات عائد کیے تھے، جس کے بعد وال اسٹریٹ میں مندی دیکھی گئی اور بڑی ٹیکنالوجی کمپنیوں کے حصص گر گئے۔
ماہرین کا کہنا ہے کہ چین کا فوری جوابی اقدام نہ کرنا اس بات کی علامت ہے کہ مذاکرات کی گنجائش ابھی باقی ہے، تاہم کشیدگی بڑھنے کی صورت میں نومبر میں ہونے والا ٹرمپ–شی اجلاس خطرے میں پڑ سکتا ہے۔