پیراشوٹ نہ کھلنے سے امدادی پیکٹ فلسطینیوں پر گرگیا؛5 جاں بحق،10 زخمی

غزہ میں ہیلی کاپٹر کے ذریعے سے امدادی سامان پھینکنے کے دوران ایک بھاری پیکٹ پیرا شوٹ نہ کھلنے کی وجہ سے چھت پر امداد کے منتظر فلسطینی خاندان پر گر گیا۔عالمی خبر رساں ادارے کے مطابق اردن کی فوج کے ایک اہلکار نے نام نہ ظاہر کرنے کی شرط پر اے ایف پی کو بتایا کہ امدادی سامان کو ہیلی کاپٹرز سے پیراشوٹ کے ذریعے پھینکنے کے آپریشن میں اردن اور امریکا ہیں۔اردن کی فوج کے اہلکار نے مزید بتایا کہ ہمارے ہیلی کاپٹرز نے دیگر 4 ممالک کے ساتھ مل کر اپنا امدادی سامان کی ترسیل کا آپریشن بغیر کسی جانی یا مالی نقصان کے مکمل کیا تاہم امریکی آپریشن سے متعلق کوئی معلومات نہیں۔اے ایف پی نے اس معاملے پر امریکی فوج کا ردعمل لینے کی کوشش کی لیکن تبصرے کے لیے کوئی دستیاب نہ تھا۔امدادی سامان کا پیکٹ کسی راکٹ کی تیزی سے گرا۔ اس کی رفتار اور وزن کا اندازہ اس بات سے لگایا جا سکتا ہے کہ مکان کی چھت کو شدید نقصان پہنچا اور ایک دیوار گر گئی تھی۔یہ افسوسناک واقعہ غزہ کے ساحلی علاقے الشطی کے پنای گزین کیمپ میں پیش آیا جس میں اب تک 5 افراد کے جاں بحق اور 10 کے زخمی ہونے کی اطلاعات ہیں۔