ایٹمی جنگ چھڑی تو صرف امریکا کی 98 فیصد آبادی بھوک سے ہلاک ہوجائیگی،تحقیقاتی رپورٹ

نیویارک:پہلی عالمگیر جنگ کے بعد عالمی تنازعات کو تصادم سے پہلے ختم کرنے کی نیت سے ’لیگ آف نیشنز‘ قائم کی گئی تھی، لیکن یہ ادارہ عالمی امن کی ضمانت فراہم کرنے میں بْری طرح سے ناکام ثابت ہوا۔ اسے قائم ہوئے دو دہائیاں بھی نہ گزریں تھیں کہ دنیا ایک نئی عالمی جنگ کے شعلوں میں جل رہی تھی۔
جب ایک ایسی بڑی جنگ کے خطرات منڈلا رہے ہوں تو یہ اندیشہ پوری شدت کے ساتھ سامنے آتا ہے کہ اگر جنگ ایٹمی ٹکرائو میں تبدیل ہوگئی تو پھر کیا ہوگا؟۔ حال ہی میں معتبر جریدے ‘Nature Food’ میں ایک تحقیقی رپورٹ شائع ہوئی ہے جس میں ایٹمی تصادم کی صورتحال میں ممکنہ تباہ کاریوں کا ایک جائزہ مرتب کیا گیا ہے۔
اس رپورٹ کو کمپیوٹر سیمولیشن (Simulations) کی مدد سے ایٹمی ہتھیاروں کے استعمال سے پیدا ہونے والی تابکاری، حدت اور دھماکے کے دھچکے سے چلنے والی تباہی کی لہر کی سمت اور شدت کی نقشہ کشی کی گئی ہے۔
رپورٹ میں فضاء اور ماحول میں آنے والی منفی تبدیلیوں اور زراعت پر مضر اثرات کا تفصیلی جائزہ پیش کیا گیا ہے۔ رپورٹ میں بتایا گیا ہے کہ ایٹمی جنگ چھڑ گئی تو 6 ارب 70 کروڑ افراد لقمہ اجل بن جائیں گے اور خوراک کی ترسیل کا سارا نظام تباہی سے دوچار ہو جائے گا۔
امریکہ، کینیڈا، یورپ کے بہت سے حصوں میں قحط جیسی صورتحال پیدا ہوجائے گی۔ امریکا کی 98 فیصد آبادی بھوک سے ہلاک ہوجائے گی۔ یہ تعداد 31 کروڑ 12 لاکھ بنتی ہے۔
جنوبی امریکا، آسٹریلیا اور کئی چھوٹے خطے ایٹمی جنگ کی تباہ کاریوں کو نسبتاً بہتر طور پر سہہ جانے کی صلاحیت رکھتے ہیں۔ ان ممالک کی زراعت زیادہ مستحکم بنیادوں پر استوار ہے جس بنا پر یہاں تباہ کاری کو برداشت کرنے کی صلاحیت زیادہ ہے۔
ارجنٹائن، برازیل، یوراگوئے، پیرا گوئے، آسٹریلیا، آئس لینڈ اور اومان زراعت کے معاملے میں مستحکم ممالک ہیں۔ یہ ممالک عالمی بحران کے باوجود اپنے لوگوں کی غذائی ضروریات پوری کرنے کے قابل رہیں گے۔
لائیو اسٹاک (مویشیوں) پر انحصار کرنے والا غذائی نظام تین طرح کے حالات سے دوچار ہوسکتا ہے۔ اول یہ کہ مویشی ہلاک نہیں ہوتے اور غذائی نظام کام کرتا رہتا ہے۔ دوم یہ کہ پہلے سال کے اندر دنیا بھر کے آدھے مویشی ہلاک ہوجاتے ہیں اور مویشیوں کی آدھی خوراک انسان کے لئے استعمال میں لائی جاتی ہے۔ تیسری صورت یہ ہوسکتی ہے کہ مویشیوں کی آدھی خوراک انسانوں کے زیر استعمال لائی جائے اور آدھی سے مویشی گزارہ کریں۔
اس صورت میں خوراک کے ذرائع محدود ہوں گے اور صرف انتہائی بنیادی ضرورتیں ہی پوری ہو پائیں گی۔ جنگ دوسرے سال میں داخل ہوگئی تو لوگوں کو کم ترین غذائیت کے ساتھ زندہ رہنا ہوگا۔ایٹمی حملے کا فوری اثر انسانی زندگیوں پر پڑے گا۔
قبرص میں واقع ’یونیورسٹی آف نکوسیا‘ میں بھی حال ہی میں ایک تحقیق ہوئی ہے جس میں یہ جاننے کی کوشش کی گئی ہے کہ ایٹمی حملے کی صورت میں زندگی بچانے کا بہترین طریقہ کیا ہوسکتا ہے۔