امریکہ کے 39 ویں صدر جمی کارٹر انتقال کر گئے،جوبائیڈن، ٹرمپ کے اہم پیغامات

واشنگٹن :امریکہ کے 39 ویں صدر جمی کارٹر 100 برس کی عمر میں انتقال کر گئے۔
کارٹر سینٹر کا کہنا ہے کہ وہ اتوار کی سہ پہر جارجیا کے علاقے پلینز میں اپنے گھر میں انتقال کر گئے۔
ان کے بیٹے نے انہیں ہر اس شخص کے لئے ایک ہیرو قرار دیا جو امن، انسانی حقوق اور بے لوث محبت پر یقین رکھتا ہے۔
جمی کارٹر نے مارچ 2019 میں جارج ایچ ڈبلیو بش کو پیچھے چھوڑ کر امریکہ کے طویل العمر سابق صدر کا اعزاز حاصل کیا اور وہ پہلے امریکی صدر تھے جنہوں نے 100 برس کی عمر پائی۔
جمی کارٹر 100 برس کی عمر میں اتوار کو اپنے گھر میں اپنے خاندان کے درمیان پرامن طور پر وفات پا گئے۔
جمی کارٹر نے مارچ 2019 میں جارج ایچ ڈبلیو بش کو پیچھے چھوڑ کر امریکہ کے طویل العمر سابق صدر کا اعزاز حاصل کیا اور وہ پہلے امریکی صدر تھے جنہوں نے 100 برس کی عمر پائی۔
کارٹر اپنے سیاسی کیریئر سے قبل مونگ پھلی کے کاشتکار اور نیوی کے لیفٹیننٹ تھے۔ وہ جارجیا کے گورنر کے طور پر خدمات انجام دینے کے بعد 1977 سے 1981 تک امریکہ کے صدر رہے۔
انہیں امن کا نوبل انعام بھی دیا گیا تھا۔
ان کی اہلیہ روزالین کارٹر، جو ذہنی صحت کی حمایت اور انسانیت کی خدمت کے لیے مشہور تھیں، نومبر 2023 میں 96 سال کی عمر میں وفات پا گئیں۔
کارٹر جوڑے نے 75 برس سے زائد عرصہ ایک ساتھ گزارا اور وہ امریکہ کی تاریخ میں طویل ترین شادی شدہ صدر اور خاتونِ اول تھے۔
جمی کارٹر کی خدمات کو مختلف حلقوں میں سراہا جا رہا ہے۔ ہبیٹیٹ فار ہیومینٹی نامی فلاحی تنظیم، جس کے ساتھ کارٹر کئی دہائیوں تک جڑے رہے، نے انہیں اپنا “حقیقی دوست” قرار دیا۔
کارٹر ورک پروجیکٹ کے تحت تنظیم نے 14 ممالک میں 4300 سے زائد گھروں کی تعمیر، مرمت یا بحالی کی۔ جمی کارٹر کے انسانی حقوق اور عالمی امن کے لیے خدمات کو دنیا بھر میں یاد کیا جا رہا ہے، ان کی قیادت میں کیمپ ڈیوڈ معاہدے جیسے تاریخی اقدامات کیے گئے۔
صدر جو بائیڈن نے ان کی 100 ویں سالگرہ کے موقع پر انہیں خراج تحسین پیش کیا تھا اور ان کی وفات پر انہیں ایک عظیم انسان اور خادمِ عوام قرار دیا۔
کارٹر کی آخری رسومات کا اعلان جلد کیا جائے گا، اور ان کی یاد میں عوامی تقریبات جارجیا اور واشنگٹن ڈی سی میں منعقد کی جائیں گی۔
امریکی صدر جوبائیڈن نے سابق صدر جمی کارٹر کی آخری رسومات سرکاری اعزاز کے ساتھ ادا کرنے کا اعلان کیا ہے۔ غیرملکی خبررساں ادارے کے مطابق اپنے بیان میں امریکی صدر جوبائیڈن نے جمی کارٹر کی وفات پر تعزیت کرتے ہوئے کہا کہ امریکا اور دنیا نے ایک غیرمعمولی رہنما، سیاست دان اور انسان دوست کو کھو دیا ہے۔ ان کا کہنا تھا کہ جمی کارٹر کی شخصیت اصول، ایمان اور انسان دوستی کی علامت تھی۔جوبائیڈن نے مزید کہا کہ جو شخص با مقصد اور بامعنی زندگی گزارنے کا مطلب جاننا چاہتا ہے وہ جمی کارٹر کی شخصیت کا مطالعہ کرے۔دوسری جانب امریکا کے نو منتخب صدر ڈونلڈ ٹرمپ نے کہا کہ بطور صدر جمی کارٹر اس وقت صدر منتخب ہوئے جب امریکا کے لیے ایک اہم وقت تھا۔ انہوں نے کہا کہ جمی کارٹر نے اپنے دور میں امریکی شہریوں کی زندگی بہتر بنانے کے لیے ہر ممکن کوشش کی، اس کے لیے ہم سب ان کے شکر گزار ہیں۔