پاکستان ریڈ بال ٹیم کے مستعفی کوچ جیسن گلیسپی کی پی سی بی حکام پر سخت تنقید

لاہور:پاکستان ریڈ بال ٹیم کے مستعفی کوچ جیسن گلیسپی نے دل کی بھڑاس نکالتے ہوئے پی سی بی حکام کو سخت تنقید کا نشانہ بنا ڈالا۔
آسٹریلوی ریڈیو سے بات چیت کرتے ہوئے جیسن گلیسپی نے جہاں پاکستان کرکٹرز کے ٹیلنٹ کی تعریف کی وہاں وہ بورڈ حکام کے رویے سے سخت نالاں دکھائی دیے۔
سابق آسٹریلوی فاسٹ بولر کا مؤقف تھا کہ سلیکشن کمیٹی کے معاملات سے دور کرنے کے بعد میرے اختیارات کو بہت محدود کر دیا گیا تھا سلیکشن میں جب اعتماد میں نہیں لیا جائے گا تو میچ کی پلاننگ کیسے ہوسکتی تھی جبکہ بابر اعظم کو ڈراپ کرنے کے بارے میں بھی مجھ سے رابطہ نہیں کیا گیا۔
ہائی پرفارمنس کوچ ٹم نیلسن کے کنٹریکٹ میں توسیع نہ کرنے کو جیسن گلیسپی نے ناراضی کا اہم سبب قرار دیا۔
جیسن گلیسپی کا مؤقف ہے کہ میرا کام صرف میچ والے دن کھلاڑیوں کو کیچ پریکٹس کروانا ہی رہ گیا تھا، ان حالات میں بہتر سمجھا کہ استعفا دے کر گھر چلا جاؤں۔