ہیوسٹن میں دل دل پاکستان پینل کامیاب،سراج نارسی پاکستان ایسوسی ایشن آف گریٹرہیوسٹن کے نئے صدر

ہیوسٹن میں دل دل پاکستان پینل کامیاب،سراج نارسی پاکستان ایسوسی ایشن آف گریٹرہیوسٹن کے نئے صدر

ہیوسٹن(نمائندہ خصوصی)پاکستانی امریکن کی سب سے پرانی کمیونٹی تنظیم پاکستان ایسوسی ایشن آف گریٹر ہیوسٹن کے انتخابات میں دل دل پاکستان پینل نے کامیابی حاصل کرلی۔ صدارتی امیدوار سراج نارسی پاکستان ایسوسی ایشن آف گریٹر ہیوسٹن کے نئے صدر جبکہ عامر زیدی جنرل سیکریٹری منتخب ہوگئے ۔پاکستان ایسوسی ایشن آف گریٹر ہیوسٹن کے انتخابی نتائج کے مطابق صدارتی امیدوار سراج نارسی 908 ووٹ لے کر پاکستان ایسوسی ایشن آف گریٹر ہیوسٹن کے نئے صدر جبکہ عامر زیدی 919 ووٹ لے کر جنرل سیکریٹری منتخب ہوگئے۔چیئرمین الیکشن کمیٹی راشد کھوکھر کی جانب سے فراہم کردہ اعدادا شمار کے مطابق چیئر پرسن برائے تعلیمی کمیٹی کے عہدے پر عاصم رضا 850 ووٹ جبکہ چیئر پرسن انفارمیشن کمیٹی کے عہدے پر خرم زئی 980 ووٹ لے کر کامیاب قرار پائے ۔سرد موسم میں بارش کی وجہ سے ووٹرز کا ٹرن آوٹ بری طرح متاثر ہوا جس کے باوجود مجموعی طور پر 1299 ووٹرز نے اپنا حق رائے دہی استعمال کیا۔انتخابات میں واضح فرق سے کامیابی کے بعد میڈیا سے گفتگو کرتے ہوئے نو منتخب صدر سراج نارسی کا کہنا تھا کہ ہماری اولین ترجیحی ایسوسی ایشن کے پلیٹ فارم سے پاکستان کے نام اور وقار کو بلند کرنا اور پاکستانی امریکی کمیونٹی کے مسائل کے حل پر توجہ دینا ہے۔انتخابی نتائج کے اعلان کے بعد کامیاب امیدواروں کے حامیوں نے پاکستان سینٹر ہیوسٹن کے باہر جشن منایا، ایک دوسرے کو کامیابی کی مبارکباد پیش کی اور مٹھائی تقسیم کی۔