انٹرنیشنل ہاکی فیڈریشن کا پاکستان ہاکی کی مدد کرنے کا فیصلہ

لاہور:انٹرنیشنل ہاکی فیڈریشن نے پاکستان ہاکی کی مدد کے لیے پروجیکٹ پاکستان شروع کرنے کا فیصلہ کرلیا۔
انٹرنیشنل ہاکی فیڈریشن کے صدر طیب اکرام نے کہا ہے کہ پاکستان کی ایشیا اور ورلڈ ہاکی کو بہت ضرورت ہے، چند سال پہلے پراجیکٹ انڈیا کا آغاز کیا تھا، بھارت نے بھی اس طرز کے پراجیکٹ کو اپنا کر ہاکی میں اپنے گراف کو بلند کیا ہے، اب چند ماہ میں ہم پراجیکٹ پاکستان بھی شروع کرنے جارہے ہیں۔
انہوں نے کہا کہ پاکستان کے ساتھ ایسا ہی ایک پراجیکٹ افریقہ کے لیے ہوگا، ہمارا فوکس ہے کہ پاکستان اپنے کھوئے ہوئے مقام پر واپس آجائے، اس کے لیے ضروری ہے کہ آپ کو بہت اچھا ٹیلنٹ چاہئے، اس کے ساتھ ہائی پرفارمنس پروفیشنل ازم درکار ہوگا۔ اس وقت پاکستان مالی وسائل کی کمی کی وجہ سے مشکلات کا شکار ہے۔
طیب اکرام نے کہا کہ پاکستان کو ایک مضبوط فنانشل ماڈل کی ضرورت ہے۔اس کے ساتھ حکومت کی سو فیص کمٹ منٹ چاہئے۔ ابھی پیرس اولمپکس میں بارہ ممالک کھیلے ہیں، مزید آٹھ سے دس ممالک ایسے ہیں جو اولمپک کھیل سکتے تھے لیکن ان کے پاس فنانشل ماڈل کے ساتھ حکومت کی کمٹ منٹ کا فقدان تھا۔