کیرولین لیویٹ وائٹ ہاؤس کی پریس سیکریٹری نامزد

واشنگٹن:نومنتخب امریکی صدر ڈونلڈ ٹرمپ نے اپنی انتخابی مہم کی ترجمان کیرولین لیویٹ کو وائٹ ہاؤس کی پریس سیکریٹری نامزد کرنے کا اعلان کردیا۔
ستائیس سالہ کیرولین لیویٹ امریکی تاریخ میں وائٹ ہاؤس کی سب سے کم عمر پریس سیکرٹری ہوں گی، نیو ہیمپشائر سے تعلق رکھنے والی لیویٹ نے اپنی آبائی ریاست کے ایک کیتھولک کالج سینٹ اینسلم کالج سے مواصلات اور سیاسیات کی تعلیم حاصل کر رکھی ہے۔
نومنتخب صدر نے ایک بیان میں کہا کہ انہیں یقین ہے کہ کیرولین لیویٹ بہترین کارکردگی کا مظاہرہ کریں گی اور امریکی عوام تک ہمارا پیغام پہنچانے میں مدد کریں گی۔
ڈونلڈ ٹرمپ نے کہا کہ کیرولین ہوشیار اور انتہائی موثر رابطہ کار ثابت ہوئی ہیں، ہم ملکر امریکا کو دوبارہ عظیم بنائیں۔
کیرولین لیویٹ 2019 میں گریجویشن کے فورا بعد ڈونلڈ ٹرمپ کے پہلے دور میں وائٹ ہاؤس میں بطور اسسٹنٹ پریس سیکریٹری کام کرچکی ہیں۔
وائٹ ہاؤس چھوڑنے کے بعد لیویٹ نے ریپبلکن کانگریس کی ایک سینیئر خاتون ایلیس سٹیفانیک کے لیے کمیونیکیشن ڈائریکٹر کے طور پر خدمات انجام دیں جنہیں نومنتخب صدر ٹرمپ نے اقوام متحدہ کی سفیر کے طور پر کام کرنے کے لیے نامزد کیا ہے۔
اس سے قبل رون زیگلر امریکی تاریخ میں وائٹ ہاؤس کے سب سے کم عمر پریس سیکرٹری تھے جنہوں نے 29 سال کی عمر میں یہ ذمہ دار انجام دی، جنہیں 1969 میں سابق امریکی صدر رچرڈ نکسن نے مقرر کیا تھا۔