پی ایس ایل2025؛ مجوزہ شیڈول فرنچائزز کو ارسال

پاکستان سپر لیگ (پی ایس ایل) کا دسواں ایڈیشن 12 اپریل سے راولپنڈی میں سجانے کا ارادہ کر لیا گیا۔ پاکستان کرکٹ بورڈ نے پی ایس ایل 10 کا مجوزہ شیڈول فرنچائزز کو ارسال کردیا ہے، ایونٹ کے سب سے زیادہ 10 میچز کی میزبانی لاہور کے قذافی اسٹیڈیم کو دی گئی ہے۔پنڈی کرکٹ گراؤنڈ میں 8 میچز کھیلے جائیں گے جبکہ نیشنل اسٹیڈیم کراچی اور ملتان اسٹیڈیم 5،5 میچز کی میزبانی کریں گے۔ 4 میچز نیوٹرل وینیو پر ہوں گے۔ کراچی میں کم میچز کی وجہ رواں برس محدود تعداد میں کراؤڈ کی آمد بنی، دفاعی چیمپئن اسلام آباد یونائیٹڈ اور لاہور قلندرزکے تمام 10 میچز ڈے اینڈ نائٹ ہوں گے۔کراچی کنگز اور پشاور زلمی 9،9 جبکہ کوئٹہ گلیڈی ایٹرز اور ملتان سلطانز8،8 میچز برقی قمقموں کی روشنی میں کھیلیں گے۔ کراچی میں شیڈول پانچوں میچز میزبان ٹیم کنگز کے ہوں گے۔قلندرز کو بھی ہوم گراؤنڈ پر آدھے میچز کھیلنے ہیں،کوئٹہ گلیڈی ایٹرز کے 5 میچز لاہور میں ہوں گے، سلطانز ہوم گراؤنڈ ملتان اور اسلام آباد یونائیٹڈ راولپنڈی میں 5، 5 بار ایکشن میں نظر آئیں گے۔