عمران خان کی ضمانت کی درخواستوں پر تمام مقدمات کا مکمل ریکارڈ طلب

راولپنڈی: بانی پی ٹی آئی عمران خان کے خلاف 26 نومبر احتجاج کے 6 مقدمات میں ضمانت کی درخواست پر عدالت نے آئندہ تاریخ پر تمام مقدمات کا مکمل ریکارڈ طلب کر لیا۔
راولپنڈی کی انسداد دہشت گردی کی خصوصی عدالت کے جج امجد علی شاہ نے عمران خان کی 26 نومبر احتجاج کے 6 مقدمات میں ضمانت کی درخواستوں پر سماعت کی۔
آج بھی ضمانت کی درخواستوں پر دلائل نہ ہوسکے، عدالت نے آئندہ تاریخ پر تمام چھ مقدمات کا مکمل ریکارڈ طلب کر لیا اور سماعت 6 نومبر تک ملتوی کر دی۔
واضح رہے کہ ان مقدمات میں بشریٰ بی بی سمیت تمام ملزمان کی ضمانتیں منظور ہوچکی ہیں، مقدمات میں تھانہ نصیر آباد کے کانسٹیبل کے قتل کا مقدمہ بھی شامل ہے۔