آبنائے ہرمز کے قریب امریکی گن شپ ہیلی کاپٹر گر کر تباہ

آبنائے ہرمز کے قریب امریکی فوج کا ایک اپاچی گن شپ ہیلی کاپٹر حادثے کا شکار ہو کر تباہ ہوگیا۔
امریکی میڈیا رپورٹس کے مطابق ہیلی کاپٹر میں سوار دونوں اہلکاروں کو بحفاظت ریسکیو کر لیا گیا ہے اور حادثے میں کسی جانی نقصان کی اطلاع نہیں ملی۔
امریکی اخبار کی رپورٹ کے مطابق حادثہ آبنائے ہرمز کے قریب پیش آیا، جو عالمی سطح پر تیل کی ترسیل کے لیے انتہائی اہم بحری گزرگاہ سمجھی جاتی ہے۔ واقعے کے بعد امدادی ٹیموں نے فوری کارروائی کرتے ہوئے ہیلی کاپٹر میں موجود عملے کو محفوظ مقام پر منتقل کر دیا۔
رپورٹ کے مطابق تاحال یہ واضح نہیں ہو سکا کہ اپاچی گن شپ ہیلی کاپٹر ایرانی فائرنگ کے نتیجے میں تباہ ہوا یا یہ کسی فنی خرابی، تکنیکی مسئلے یا حادثاتی صورتحال کا شکار ہوا۔ امریکی حکام نے واقعے کی وجوہات جاننے کے لیے تحقیقات شروع کر دی ہیں۔
دفاعی ذرائع کا کہنا ہے کہ حادثے کے مختلف پہلوؤں کا جائزہ لیا جا رہا ہے اور تحقیقات مکمل ہونے کے بعد ہی واقعے کی اصل وجہ سامنے آسکے گی۔
اس واقعے نے خطے میں جاری کشیدگی کے تناظر میں نئی تشویش پیدا کر دی ہے، کیونکہ آبنائے ہرمز پہلے ہی عالمی توجہ کا مرکز بنی ہوئی ہے۔
امریکی حکام کی جانب سے ابھی تک حادثے کے حوالے سے مزید تفصیلات جاری نہیں کی گئیں، تاہم تحقیقات کے نتائج کا انتظار کیا جا رہا ہے۔