امریکی گلوکارہ کیٹی پیری نے آل ویمن اسپیس فلائٹ کے ساتھ خلا کا سفر کرلیا

واشنگٹن:امریکی گلوکارہ کیٹی پیری نے ’آل ویمن اسپیس فلائٹ‘ کے ساتھ خلا کی سرحد عبور کرلی۔
معروف امریکی گلوکارہ کیٹی پیری نے پیر کے روز خلا کی ایک مختصر پرواز کی، جس میں صرف خواتین پر مشتمل عملہ شامل تھا۔ یہ پرواز امریکی بزنس مین جیف بیزوس کی خلائی کمپنی ’بلو اوریجن‘ کے ذریعے امریکی ریاست ٹیکساس سے صبح 8:30 بجے روانہ ہوئی اور تقریباً 10 منٹ بعد بحفاظت زمین پر واپس آئی۔
اس مشن میں کیٹی پیری کے ساتھ جیف بیزوس کی منگیتر لورین سانچیز اور مشہور ٹی وی میزبان گیل کنگ سمیت چھ خواتین شامل تھیں۔
راکٹ نے زمین سے 100 کلومیٹر (تقریباً 62 میل) کی بلندی تک پرواز کی، جو خلا کی بین الاقوامی طور پر تسلیم شدہ سرحد ’کارمن لائن‘ سے آگے ہے۔
گیل کنگ کے مطابق پرواز کے دوران پیری نے ’واٹ آ ونڈرفل ورلڈ‘ گانا گایا۔ واپسی پر پیری نے راکٹ سے باہر نکل کر زمین پر بوسہ دیا اور کہا، ’یہ ایک 10 میں سے 10 تجربہ تھا‘۔